20/06/2014 23:23:00

Kosta Rika mposht Italinë, 1-0

Kosta Rika kthehet në një prej surprizave më të mëdha deri më tani në këtë botëror futbolli

HermesNews - Kosta Rika kthehet në një prej surprizave më të mëdha deri më tani në këtë botëror futbolli. Pasi mundën dy herë kampionët e botës, Uruguajin në ndeshjen e parë, ekipi i Amerikës Qendrore mposhti një kampione më të madhe, Italinë. Të kaltrit e Prandelit humbën 1 me 0, duke ndërlikuar shumë situatën. Tashmë mbetet vendimtare, ndeshja e fundit në grup përballë Uruguajit.
Italia u shfaq e lodhur, pavarësisht disa ndryshimeve në formacion. Në portë u rikthye Bufon, pas një lëndimi që e la jashtë ndeshjen e parë, si dhe mbrojtësi i djathtë i Milanit, Abate dje mesfushori Tiago Mota.

Loja e italianëve u përqendrua te sulmuesi Baloteli, por ky i fundit nuk u furnizua siç duhet nga mesfusha, duke bërë që në fushë të shfaqej një Itali e vakët.
Fundi i pjesës së parë shënoi edhe një moment të dyshimtë, kur sulmuesi i Kosta Rikës Campbell u rrëzua në zonë, por arbitri vazhdoi lojën.
Vetëm një minutë më vonë, në të 44-ën, pas një harkimi nga e majta, sulmuesi tjetër i këtij ekipi, Ruiz gjuan me kokë dhe topi përplaset në traversë e më pas në tokë. Teknologjia shuajti çdo dyshim edhe në këtë rast, pasi u pa se topi e kishte kaluar vijën fatale.

Pjesa e dytë shfaqi një Itali që pavarësisht ndryshimeve, me futjen në lojë të Kasanos, Insinjes dhe Çerçit, nuk arriti të gjente portën kundërshtare në asnjë moment. Ndërsa Kosta Rika u mbyll në zonën e saj, në mbrojtje të rezultatit, që i çon në fazën e 1 të 8-ve në këtë botëror.

Arbër Meçenovi

Dërgo me email | Stampo artikullin